Golfferð 5.-17. Janúar.Verð 620.000 kr.

Safari og Loitoktok 17.-22. Januar. verð 170.000 kr.

Kenía er stórkostlegt land að heimsækja. Í þessari ferð kynnumst við landi og þjóð á einstakan hátt. Við kynnumst höfuðborginni Nairobi, sem gjarnan er kölluð “græna borgin í sólinni”. Þar er að finna einstaklega fallega golfvelli, skemmtilega veitingastaði og kaffihús, flott söfn og magnað fjölbreytt mannlíf.   

Gisting í Nairobi er á Windsor Golf Hotel, sem er 5 stjörnu hótel, hannað í gömlum breskum herragarðsstíl með afrískum áhrifum. Á Windsor er að finna glæsilegan 18 holu golfvöll. Öll herbergin eru með frábæru útsýni yfir golfvöllinn. Á hótelinu er einnig líkamsræktraðstaða, upphituð sundlaug, nudd og snyrtistofa, flottur veitingastaður og bistro við sundlaugina. Í Vipingo á ströndinni er gist í glæsilegum golf villum í kringum golfvöllinn.

Við ferðina er hægt að bæta við safarí ferð. Þá heimsækjum við þjóðgarðana Amboseli og Tsavo West og gistum á fjögurra stjörnu safaríhótelum. Við heimsækjum einnig Loitoktok við rætur Kilimanjaro, hæsta fjalls Afríku.

Verð á golfferð 5. - 17. Janúar: 620.000 kr á mann miðað við tvo í herbergi í hálfu fæði og 10 golfhringjum.
Innifalið: Flug frá Íslandi til Kenía. Gisting með morgunverði og kvöldverð eða hádegisverði. Tíu golfhringir með caddy. Aðgangseyrir á Karen Blixen safnið. Allur ferðakostnaður innanbæjar.
Verð án golfs: 520.000 kr.
Aukagjald fyrir einn í herpergi: 80.000 kr.
Ekki innifalið: Vegabréfsáritun. Ein máltíð á dag.
Verð á viðbótar safaríferð 17.- 21.janúar: 170.000 kr.
Innifalið: Gisting með fullu fæði, safaríbílar, aðgangseyrir í tvo þjóðgarða.
Ekki innifalið: Drykkir.
Heildarverð fyrir báðar ferðir er 790.000 kr. á mann miðað við tvo í herbergi
Fararstjórar eru Þórunn Helgadóttir sem hefur búið og starfað í Kenía í 18 ár og Samuel Lusiru Gona frá Kenía.

Ferðaáætlun:

Dagur 1. Mánudagur 5. janúar - Brottför frá Íslandi
Flogið frá í Keflavík til Evrópuborgar, t.d. Kaupmannahafnar eða Oslo og þaðan til Qatar og áfram til Nairobi.

Dagur 2. Þriðjudagur 6. Janúar - Lending í Nairobi
Lending snemma að morgni. Dagurinn nýttur í slökun á Windsor.

Dagur 3. Miðvikudagur 7. Janúar - Golf á Windsor
Fyrsti golfhringurinn. Hægt er að taka daginn snemma og spila að morgni eða sofa út og spila seinnipartinn. Eftir golfleik er kjörið að njóta lífsins á veitingastaðnum sem er með útsýni yfir völlinn eða slaka á við laugina.

Dagur 4. Fimmtudagur 8. Janúar - Golf á Windsor
Meira Golf! Hringur tvö á Windsor.

Dagur 5. Föstudagur  9. Janúar - Golf á Windsor
Hringur þrjú á Windsor. Eftir hádegi förum við í kaffitúr á Hótel Windsor þar sem 500 ekrur af kaffirækt eru á landareigninni. Allt kaffi á Windsor er því ræktað, þurrkað og ristað á staðnum. Við förum í skoðunarferð á kaffiakrana, fræðumst um kaffið, sjáum það ristað og smökkum.

Dagur 6. Laugardagur 10. Janúar - Golf á Windsor
Hringur fjögur á Windsor.

Dagur 7. Sunnudagur 11. Janúar - Golf á Windsor
Hringur fimm á Windsor.

Dagur 8. Mánudagur 12. Janúar - Golf á Muthaiga Golf club
Hringur sex. Nú prófum við Muthaiga golfvöllinn, glæsilegan völl í fögru skóglendi þar sem Kenya Open er haldið árlega. Eftir hádegi verður boðið uppá heimsókn í Harvestskólann sem Íslenska barnahjálpin rekur í Nairobi.

Dagur 9. Þriðjudagur 13. Janúar - Golf á Muthaiga Golf club
Hringur sjö á Muthaiga golf club

Dagur 10. Miðvikudagur 14. Janúar  - Golf á Karen Golf club
Hringur átta á Karen golfclub. Við keyrum til suðurhluta Nairobi og prófum Karen golfvöllinn, sem er á landi Karenar Blixen. Þetta er mjög fallegur völlur sem ár eftir ár hefur verið kosinn besti golfvöllurinn í Nairobi.
Eftir golfið heimsækjum við Karen Blixen safnið sem er á heimili hennar þar sem Óskarsverðlaunamyndin Out of Africa var tekin upp.

Dagur 11. Fimmtudagur 15. Janúar  - Golf á Muthaiga Golf club
Hringur níu á Muthaiga golf club

Dagur 12. Föstudagur 16. Janúar - Golf á Windsor
Hringur tíu á Windsor. Þennan dag er einnig val um að fara um morguninn í teferð upp til Tigoni og spila golf seinnipartinn.

Safarí og Loitoktok

Dagur 13. Laugardagur 17. janúar
Þennan morgun keyrum við til Loitoktok. Við gistum í Ol-doinyo house sem er nýtt gistihús Íslensku barnahjálparinnar og borðum þar hádegismat.
Eftir hádegi förum við í heimsókn í skólann sem er þar í göngufæri.
Kvöldmatur heima í húsi og varðeldur.

Dagur 14. Sunnudagur 18. janúar
Við byrjum daginn á því að sækja sunnudagsmessu nemenda skólans. Það er ótrúlega skemmtileg upplifun. Við kynnumst nemendum betur og eyðum smá tíma með þeim. Förum í leiki og lærum dansa. Seinnipartinn keyrum við út í byggðirnar og heimsækjum Masaai fólkið í þeirra heimabyggð. Varðeldur um kvöldið.

Safarí: Amboseli Þjóðgarðurinn

Dagur 15. Mánudagur 19. janúar
Amboseli þjóðgarðurinn liggur við rætur Kilimanjaro. Hann er stundum kallaður fílahöfuðborg heimsins. Snemma um morguninn förum við í safaríferð um garðinn og skoðum dýralífið. Um kl. 12.30 förum við á hótel í garðinum og borðum þar hádegismat. Þeir sem vilja geta farið í laugina. Við slökum á á hótelinu til um kl. 15.30. Þá förum við aftur á stjá að skoða dýralífið. Reynum að koma auga á ljón. Við förum út úr garðinum um kl. 18.30 og gistum heima í húsi.

Tsavo West þjóðgarðurinn

Dagur 16. Þriðjudagur 20. janúar
Lagt af stað í Tsavo West þjóðgarðinn snemma að morgni. Tsavo West er víðfeðmur náttúrugarður. Hann er afskekktur og skartar einstaklega fallegu landslagi. Við komum á hótelið um hádegi og fáum okkur mat, förum í laugina og njótum þessa dásamlega staðar. Í eftirmiðdaginn keyrum við til Mzima springs og förum þar í stuttan göngutúr. Þar má gjarnan koma auga á flóðhesta og krókódíla.

Dagur 17. Miðvikudagur 21. janúar
Við leggjum af stað frá hótelinu um morguninn og höldum í átt að Ngutuni Lodge þar sem við komum um miðjan dag. Þar er frábært tækifæri til að fylgjast með dýrunum við vatnsbólið, fara í sund og jafnvel fara í smá safarí akstur til að reyna að koma auga á ljón.

Dagur 18. Fimmtudagur 22. janúar

Við tökum lestin að mogni til Nairobi. Höfum tíma þar til að slaka aðeins á seinnipartinn og undirbúa okkur undir flug að kvöldi, heim til íslands. Við lendum þar seinnipartinn 23. Janúar.

Möguleiki á Viðbótarferð:

Keníska ströndin - Indlandshafið 22. -26. janúar. Verð 100.000 kr

Dagur 19. Fimmtudagur 22. janúar
Við höldum ferðalaginu áfram niður að Indlandshafinu. Þar munum við gista á flottu fjögurra stjörnu hóteli við ströndina með öllum gæðum.

Dagur 20. Föstudagur 23. janúar
Slökunardagur á hótelinu. Hægt er að nota tímann til dæmis fyrir spa á hótelinu, fara í skoðunarferð, kíkja í búðir, fara í bátsferð og snorkl eða fara á bak á kameldýri á ströndinni.
Kvöldmatur á hótelinu eða við förum út að borða á spennandi stað.

Dagur 21. Laugardagur 24. janúar
Frjáls dagur og tími til að gera allt það sem ekki náðist að gera daginn áður. Fara í skoðunarferð eða slaka á við ströndina. Kvöldmatur á hótelinu.

Dagur 22. Sunnudagur 25. Janúar  
Eftir morgunmatinn kl. 10:00 tékkum við út af hótelinu og förum í skoðunarferð til borgarinnar Mombasa. Þar skoðum við gamla bæinn og fræðumst um merkilega sögu.
Seinnipartinn tökum við klukkutíma flug til Nairobi.
Flug aftur til Íslands um kvöldið með Qatar í gegnum Oslo. Lent á Íslandi seinnipartinn 23. Janúar.

Golfið og vellirnir

Loftslagið í Nairobi er einstaklega milt og þægilegt, sem skapar kjöraðstæður fyrir golf. Borgin er í um 1600-1700 metra hæð og því verður ekki of heitt. Hitastigið í lok maí er frá um 15 gráðum á nóttunni og upp í 23-25 gráður eftir hádegi. Þunna loftið gerir það einnig að verkum að golfkúlan svífur að jafnaði um 10 metrum lengra.

Windsor völlurinn

er sérlega fallegur golfvöllur. Hann er par 72 og liggur í gegnum skóglendi og gamlar kaffiekrur þar sem er mikið fugla og dýralíf.
Apar eru fastagestir á vellinum. Skógurinn gerir það að verkum að næsta hola kemur aðeins í ljós við komu á næsta teig, fyrir utan holu 1 og 18 sem eru á opnum grænum bölum. Það eru vel yfir sjötíu glompur á vellinum.

Muthaiga golf klúbburinn

er í um 8 mínútna akstur frá Windsor. Þessi völlur er metinn besti völlurinn í Nairobi og þar er Kenya open golfkeppnin haldin árlega. Fyrstu 9 holurnar voru gerðar árið 1913 og árið 1926 var völlurinn stækkaður á 18 holur. Hann var svo endurhannaður á árunum 2004 til 2005 af suður-afríska arkitektinum Peter Matkovich. Muthaiga völlurinn liggur í gegnum Karura skóglendið en er opnari en Windsor völlurinn. Töluvert er af tjörnum og vötnum.

Karen Golf club

Völlurinn er í suðurhluta Nairobi og er staðsettur á fyrrum kaffiekrum Karenar Blixen, hins heimsfræga danska rithöfunds. Hún plantaði þar trjám sem enn er að finna á vellinum í dag. Karen Country Club var stofnaður árið 1937, sama ár og bókin Out of Africa kom út. Völlurinn er fjölbreyttur og skemmtilegur og einnig þekktur fyrir litskrúðug blómstrandi tré og runna. Hann liggur um votlendi þar sem er að finna mikið fuglalíf og litlar dikdik antilópur. Sjá má Ngong hæðir í bakgrunni.